humne ashkon se tera nam likha pani par

ham ne ashkoñ se tirā naam likhā paanī par

yuuñ sar-e-shām jalāyā hai diyā paanī par

bhīgī palkoñ pe ubharte ga.e yādoñ ke nuqūsh

dekhte dekhte ik shahr basā paanī par

na.e mausam kī ḳhabar ḳhushk zamīnoñ ke liye

tairtā aatā hai pattā jo harā paanī par

munhasir chaar 'anāsir pe hai insāñ kā vujūd

naqsh miTTī kā banā aag havā paanī par

kisī zardār ke aage na pasārā dāman

ek ḳhud.dār ka.ī roz jiyā paanī par

kaun guzrā hai ulajhtā huā maujoñ se 'nasīm'

duur tak kis ke haiñ naqsh-e-kaf-e-pā paanī par

hum ne ashkon se tera nam likha pani par

yun sar-e-sham jalaya hai diya pani par

bhigi palkon pe ubharte gae yaadon ke nuqush

dekhte dekhte ek shahr basa pani par

nae mausam ki KHabar KHushk zaminon ke liye

tairta aata hai patta jo hara pani par

munhasir chaar 'anasir pe hai insan ka wujud

naqsh miTTi ka bana aag hawa pani par

kisi zardar ke aage na pasara daman

ek KHuddar kai roz jiya pani par

kaun guzra hai ulajhta hua maujon se 'nasim'

dur tak kis ke hain naqsh-e-kaf-e-pa pani par