humne buton ko ram kiya tumne kya kiya

ham ne butoñ ko raam kiyā tum ne kyā kiyā

ham ne ḳhayāl-e-ḳhām kiyā tum ne kyā kiyā

ham ne to pā-e-nāzuk-e-jānāñ pe jaan dī

sajda kiyā qiyām kiyā tum ne kyā kiyā

dīvāngī meñ hosh kī bāteñ kiyā kiye

ham ne ye ehtimām kiyā tum ne kyā kiyā

gahre haiñ ghaav dil ke pa tum se gila nahīñ

ye to zabāñ ne kaam kiyā tum ne kyā kiyā

kis sādgī se kahte haiñ mar jaa.eñ ahl-e-dil

ham ne to qatl-e-ām kiyā tum ne kyā kiyā

va.ade kī sub.h shaam huī phir bhī tum na aa.e

ham ne sahar ko shaam kiyā tum ne kyā kiyā

kyoñ nā-tamām rah na ga.ī dil kī dāstāñ

qissa kahāñ tamām kiyā tum ne kyā kiyā

'shāriq' salām us ne liyā haañ liyā zarūr

kis shaḳhs ko salām kiyā tum ne kyā kiyā

hum ne buton ko ram kiya tum ne kya kiya

hum ne KHayal-e-KHam kiya tum ne kya kiya

hum ne to pa-e-nazuk-e-jaanan pe jaan di

sajda kiya qiyam kiya tum ne kya kiya

diwangi mein hosh ki baaten kiya kiye

hum ne ye ehtimam kiya tum ne kya kiya

gahre hain ghaw dil ke pa tum se gila nahin

ye to zaban ne kaam kiya tum ne kya kiya

kis sadgi se kahte hain mar jaen ahl-e-dil

hum ne to qatl-e-am kiya tum ne kya kiya

wade ki subh sham hui phir bhi tum na aae

hum ne sahar ko sham kiya tum ne kya kiya

kyon na-tamam rah na gai dil ki dastan

qissa kahan tamam kiya tum ne kya kiya

'shaariq' salam us ne liya han liya zarur

kis shaKHs ko salam kiya tum ne kya kiya