humne dekhi hai yahi jazb-o-asar ki surat

ham ne dekhī hai yahī jazb-o-asar kī sūrat

aañkh se dil meñ utar jaao nazar kī sūrat

ek hī shai hai bharam paikar-o-pairāhan kā

kisī aḳhbār ke ho jaao ḳhabar kī sūrat

pūchhnā chāhā thā us ne bhī havāoñ kā mizāj

haath phailā ke bañdhe paañv shajar kī sūrat

use dahlīz pe dekhā to ye mahsūs huā

koī hamrāh bhī thā gard-e-safar kī sūrat

phir tavaqqo kā simaTnā thā zarūrī ki idhar

kuchh ta.alluq se bhī aage thā agar kī sūrat

phuuT jaa.e jo kahīñ sar to ye irfāñ bhī bahut

kisī dīvār se kyā niklegī dar kī sūrat

ziist ta.abīr bhī hai ziist ibārat hī nahīñ

ham ne dekhā hai use zer-o-zabar kī sūrat

sūrat-e-hāl ko siine se lagā lo 'rāhī'

sūrat-e-hāl se kyā hogī mafar kī sūrat

hum ne dekhi hai yahi jazb-o-asar ki surat

aankh se dil mein utar jao nazar ki surat

ek hi shai hai bharam paikar-o-pairahan ka

kisi aKHbar ke ho jao KHabar ki surat

puchhna chaha tha us ne bhi hawaon ka mizaj

hath phaila ke bandhe panw shajar ki surat

use dahliz pe dekha to ye mahsus hua

koi hamrah bhi tha gard-e-safar ki surat

phir tawaqqo ka simaTna tha zaruri ki idhar

kuchh talluq se bhi aage tha agar ki surat

phuT jae jo kahin sar to ye irfan bhi bahut

kisi diwar se kya niklegi dar ki surat

zist tabir bhi hai zist ibarat hi nahin

hum ne dekha hai use zer-o-zabar ki surat

surat-e-haal ko sine se laga lo 'rahi'

surat-e-haal se kya hogi mafar ki surat