humne dil uske tain nazr guzara apna

ham ne dil us ke ta.iiñ nazr guzārā apnā

us ne samjhā na sar-e-bazm ishārā apnā

kyā pukārūñ ki sadā bhī na vahāñ jā.egī

jaane kis des gayā yaar vo pyārā apnā

le gayā duur use ḳhvāb-e-adam kā afsūñ

niiñd se phir na uThā anjuman-ārā apnā

umr ke saath judā hote chale jā.eñge yaar

kam nahīñ hogā kisī taur ḳhasārā apnā

lauT kar aa.e to bastī hai na tālāb na baaġh

ham yahīñ chhoḌ ga.e the vo nazārā apnā

shaam hote hī bhaTakte the use dekhne ko

usī tārīk galī meñ thā sitārā apnā

ġham hue aise ki aatā hī nahīñ koī javāb

naam le le ke bahut ham ne pukārā apnā

ye jo galiyāñ haiñ mire shahr kī haiñ merī rafīq

unhī galiyoñ meñ bahut vaqt guzārā apnā

ham vo bīmār-e-anā haiñ ki hue jis se ḳhafā

us ko chehra bhī dikhāyā na dobārā apnā

bārhā pesh huā ḳhil.at-e-shāhī ham ko

ham ne malbūs-e-gadā.ī na utārā apnā

kyā ḳhabar ban ga.ī kis tarah ġhazal kī sūrat

ham ne to dard hī kāġhaz pe utārā apnā

yā-alī kahne se haT jaate haiñ raste se pahāḌ

ik yahī naam hai mushkil meñ sahārā apnā

hum ne dil us ke tain nazr guzara apna

us ne samjha na sar-e-bazm ishaara apna

kya pukarun ki sada bhi na wahan jaegi

jaane kis des gaya yar wo pyara apna

le gaya dur use KHwab-e-adam ka afsun

nind se phir na uTha anjuman-ara apna

umr ke sath juda hote chale jaenge yar

kam nahin hoga kisi taur KHasara apna

lauT kar aae to basti hai na talab na bagh

hum yahin chhoD gae the wo nazara apna

sham hote hi bhaTakte the use dekhne ko

usi tarik gali mein tha sitara apna

gham hue aise ki aata hi nahin koi jawab

nam le le ke bahut hum ne pukara apna

ye jo galiyan hain mere shahr ki hain meri rafiq

unhi galiyon mein bahut waqt guzara apna

hum wo bimar-e-ana hain ki hue jis se KHafa

us ko chehra bhi dikhaya na dobara apna

barha pesh hua KHilat-e-shahi hum ko

hum ne malbus-e-gadai na utara apna

kya KHabar ban gai kis tarah ghazal ki surat

hum ne to dard hi kaghaz pe utara apna

ya-ali kahne se haT jate hain raste se pahaD

ek yahi nam hai mushkil mein sahaara apna