humne hans kar fareb khae hain

ham ne hañs kar fareb khaa.e haiñ

ham pe dushvāriyoñ ke saa.e haiñ

ab to ham zindagī se jā bhī chuke

aap ab ham se milne aa.e haiñ

jo mire saath saath rahte the

ab mire shahr se parā.e haiñ

nāḳhunoñ se khurach ke tere nuqūsh

apnī taqdīr se miTā.e haiñ

koī poshīda qahqaha to nahīñ

aap ne daañt kyoñ dabā.e haiñ

manzileñ aap kā muqaddar haiñ

merī rah meñ ka.ī sarā.e haiñ

hameñ turbat pe chheḌne mat aa

dil ke armān ab sulā.e haiñ

hum ne hans kar fareb khae hain

hum pe dushwariyon ke sae hain

ab to hum zindagi se ja bhi chuke

aap ab hum se milne aae hain

jo mere sath sath rahte the

ab mere shahr se parae hain

naKHunon se khurach ke tere nuqush

apni taqdir se miTae hain

koi poshida qahqaha to nahin

aap ne dant kyon dabae hain

manzilen aap ka muqaddar hain

meri rah mein kai sarae hain

hamein turbat pe chheDne mat aa

dil ke arman ab sulae hain