ہم نے جذبات کو سینے میں دبا رکھا ہے

ہم نے جذبات کو سینے میں دبا رکھا ہے

دل نے اس پر بڑا طوفان اٹھا رکھا ہے

تو مجھے چھوڑ چکا جا بھی چکا ہے لیکن

خود کو اب تک تری دنیا میں بسا رکھا ہے

ہے وفائی ترا لہجہ ترے جھوٹے وعدے

ایک مسکان نے ہر دکھ کو چھپا رکھا ہے

پر سکوں بیٹھے ہیں یوں تو ترے آنے پر بھی

دل کی دھڑکن نے مگر شور مچا رکھا ہے

ہم نے دشمن کا برا بھی نہیں چاہا ہے کبھی

لب پہ ہر اک کے لیے حرف دعا رکھا ہے

جاؤ اے اہل جہاں ڈھونڈ کے لاؤ اس کو

جس کے غم نے ہمیں بیمار بنا رکھا ہے

منتظر آج بھی اس کی ہیں یہ کافر آنکھیں

اب تلک راہ میں پلکوں کو بچھا رکھا ہے