humne jazbaat ko sine mein daba rakkha hai

ham ne jazbāt ko siine meñ dabā rakkhā hai

dil ne is par baḌā tūfān uThā rakkhā hai

tū mujhe chhoḌ chukā jā bhī chukā hai lekin

ḳhud ko ab tak tirī duniyā meñ basā rakkhā hai

be-vafā.ī tirā lahja tire jhūTe vā'de

ek muskān ne har dukh ko chhupā rakkhā hai

pur-sukūñ baiThe haiñ yuuñ to tire aane par bhī

dil kī dhaḌkan ne magar shor machā rakkhā hai

ham ne dushman kā burā bhī nahīñ chāhā hai kabhī

lab pe har ik ke liye harf-e-du'ā rakkhā hai

jaao ai ahl-e-jahāñ DhūñD ke laao us ko

jis ke ġham ne hameñ bīmār banā rakkhā hai

muntazir aaj bhī us kī haiñ ye kāfir āñkheñ

ab talak raah meñ palkoñ ko bichhā rakkhā hai

hum ne jazbaat ko sine mein daba rakkha hai

dil ne is par baDa tufan uTha rakkha hai

tu mujhe chhoD chuka ja bhi chuka hai lekin

KHud ko ab tak teri duniya mein basa rakkha hai

be-wafai tera lahja tere jhuTe wa'de

ek muskan ne har dukh ko chhupa rakkha hai

pur-sukun baiThe hain yun to tere aane par bhi

dil ki dhaDkan ne magar shor macha rakkha hai

hum ne dushman ka bura bhi nahin chaha hai kabhi

lab pe har ek ke liye harf-e-du'a rakkha hai

jao ai ahl-e-jahan DhunD ke lao us ko

jis ke gham ne hamein bimar bana rakkha hai

muntazir aaj bhi us ki hain ye kafir aankhen

ab talak rah mein palkon ko bichha rakkha hai