humne kabhi socha hi nahin tha aisa amal aghyar karenge

ham ne kabhī sochā hī nahīñ thā aisā amal aġhyār kareñge

jiinā bhī dushvār kareñge marnā bhī dushvār kareñge

aisī tavaqqo un se kab thī aisā kab sochā thā ham ne

ham ko hī rakkheñge pyāsā auroñ ko sarshār kareñge

apne dil kī tum se kah kar man ko halkā kar lete haiñ

tum na sunoge baat hamārī ham kis se iz.hār kareñge

azm-e-musammam le kar dil meñ aaj ye ham ne ahd kiyā hai

ġhaflat meñ jo ḳhvābīda haiñ ham un ko bedār kareñge

fikr-e-nasheman ham nahīñ karte ham karte haiñ fikr-e-gulistāñ

sab ke dukh meñ kaam ā.eñge sab kī nayyā paar kareñge

is duniyā ko chhoḌ ke ik din aage pīchhe jaanā hogā

rah ke kyā majbūr kareñge rah ke kyā muḳhtār kareñge

baḳhshī hai allāh ne ham ko ilm kī daulat quvvat-e-īmāñ

dekhnā ik din haq kī ḳhātir ham bātil par vaar kareñge

aap se hai had darja mohabbat aap ke ham haiñ aap hamāre

aap kā zikr-e-ḳhair hamesha ek nahīñ sau baar kareñge

haal meñ dukh hai 'yās' agarche mustaqbil meñ ḳhushiyāñ hoñgī

vo dete haiñ ġham dene do ham bhī ġham se pyaar kareñge

hum ne kabhi socha hi nahin tha aisa amal aghyar karenge

jina bhi dushwar karenge marna bhi dushwar karenge

aisi tawaqqo un se kab thi aisa kab socha tha hum ne

hum ko hi rakkhenge pyasa auron ko sarshaar karenge

apne dil ki tum se kah kar man ko halka kar lete hain

tum na sunoge baat hamari hum kis se izhaar karenge

azm-e-musammam le kar dil mein aaj ye hum ne ahd kiya hai

ghaflat mein jo KHwabida hain hum un ko bedar karenge

fikr-e-nasheman hum nahin karte hum karte hain fikr-e-gulistan

sab ke dukh mein kaam aaenge sab ki nayya par karenge

is duniya ko chhoD ke ek din aage pichhe jaana hoga

rah ke kya majbur karenge rah ke kya muKHtar karenge

baKHshi hai allah ne hum ko ilm ki daulat quwwat-e-iman

dekhna ek din haq ki KHatir hum baatil par war karenge

aap se hai had darja mohabbat aap ke hum hain aap hamare

aap ka zikr-e-KHair hamesha ek nahin sau bar karenge

haal mein dukh hai 'yas' agarche mustaqbil mein KHushiyan hongi

wo dete hain gham dene do hum bhi gham se pyar karenge