humne kahne ko tumhein dil se bhulaya hua hai

ham ne kahne ko tumheñ dil se bhulāyā huā hai

bas yahī daaġh hai siine meñ chhupāyā huā hai

ab giregī bhī to kaise ki bahut sabr ke saath

ham ne dīvār ko hāthoñ se banāyā huā hai

baat karne ko bahut der se sochā us se

jis kī tahrīr ko āñkhoñ meñ basāyā huā hai

chashm-e-be-aib meñ us kā hī sarāpā kyuuñ thā

jis kā ġham hadd-e-tamannā meñ samāyā huā hai

ḳhvāhish-e-qurb ke paivand haiñ hāthoñ meñ mire

ai junūñ-zād mujhe kitnā satāyā huā hai

koī kahtā hai rifāqat nahīñ milne vaalī

koī kahtā hai vo dahlīz pe aayā huā hai

vasl kī shaam kā andāza bahut mushkil thā

ham ne pūchhā thā magar us ne chhupāyā huā hai

hum ne kahne ko tumhein dil se bhulaya hua hai

bas yahi dagh hai sine mein chhupaya hua hai

ab giregi bhi to kaise ki bahut sabr ke sath

hum ne diwar ko hathon se banaya hua hai

baat karne ko bahut der se socha us se

jis ki tahrir ko aankhon mein basaya hua hai

chashm-e-be-aib mein us ka hi sarapa kyun tha

jis ka gham hadd-e-tamanna mein samaya hua hai

KHwahish-e-qurb ke paiwand hain hathon mein mere

ai junun-zad mujhe kitna sataya hua hai

koi kahta hai rifaqat nahin milne wali

koi kahta hai wo dahliz pe aaya hua hai

wasl ki sham ka andaza bahut mushkil tha

hum ne puchha tha magar us ne chhupaya hua hai