humne KHayal-e-saKHti-e-jada nahin kiya

ham ne ḳhayāl-e-saḳhtī-e-jāda nahīñ kiyā

tark-e-safar kā koī irāda nahīñ kiyā

ushshāq-e-ahd-e-nau ne sar-e-rāhguzār-e-shauq

gard-e-safar ko tan kā labāda nahīñ kiyā

ham ne bhī lauT aane meñ tāḳhīr kī bahut

us ne bhī intizār ziyāda nahīñ kiyā

ham haiñ ġham-e-firāq ke hurmat-shanās log

ġham ko supurd-e-sāġhar-o-bāda nahīñ kiyā

tere sivā bhī koī dar-e-jāñ pe aa sake

itnā bhī ham ne dil ko kushāda nahīñ kiyā

hum ne KHayal-e-saKHti-e-jada nahin kiya

tark-e-safar ka koi irada nahin kiya

ushshaq-e-ahd-e-nau ne sar-e-rahguzar-e-shauq

gard-e-safar ko tan ka labaada nahin kiya

hum ne bhi lauT aane mein taKHir ki bahut

us ne bhi intizar ziyaada nahin kiya

hum hain gham-e-firaq ke hurmat-shanas log

gham ko supurd-e-saghar-o-baada nahin kiya

tere siwa bhi koi dar-e-jaan pe aa sake

itna bhi hum ne dil ko kushada nahin kiya