humne to yahi marka mara hai safar mein

ham ne to yahī ma.arka maarā hai safar meñ

manzil kī tarah baiTh ga.e rāhguzar meñ

vo sham-e-shab-anjām kī sūrat to nahīñ thā

ik pal meñ shab-e-nisf utar aa.ī hai ghar meñ

ai nāla-e-dil-doz taḌap uTThī ḳhamoshī

hai marg-e-tamāshā kisī ābād nagar meñ

ham ḳhaak ke tuude pe khaḌe pūchh rahe haiñ

kyā lutf milā tum ko samundar ke safar meñ

ham sāya-e-dīvār-e-shikasta meñ paḌe the

DhūñDoge to pāoge hameñ sāya-e-dar meñ

ye marhala-e-qat-e-ta.alluq to kaThin thā

ik dard kā dariyā bhī hai ab dīda-e-tar meñ

ik umr ke rishtoñ ko fanā pal meñ milī hai

ham DhūñDne kyā nikle haiñ sadiyoñ ke safar meñ

tārīk-o-ḳhunuk ḳhaak kā paivand hue haiñ

ham tol ke laa.e the jinheñ la.al-o-gohar meñ

yuuñ terī tarah duur kī manzil ke musāfir

sab kuchh to nahīñ chhoḌ ke jaate kabhī ghar meñ

hum ne to yahi marka mara hai safar mein

manzil ki tarah baiTh gae rahguzar mein

wo sham-e-shab-anjam ki surat to nahin tha

ek pal mein shab-e-nisf utar aai hai ghar mein

ai nala-e-dil-doz taDap uTThi KHamoshi

hai marg-e-tamasha kisi aabaad nagar mein

hum KHak ke tude pe khaDe puchh rahe hain

kya lutf mila tum ko samundar ke safar mein

hum saya-e-diwar-e-shikasta mein paDe the

DhunDoge to paoge hamein saya-e-dar mein

ye marhala-e-qat-e-talluq to kaThin tha

ek dard ka dariya bhi hai ab dida-e-tar mein

ek umr ke rishton ko fana pal mein mili hai

hum DhunDne kya nikle hain sadiyon ke safar mein

tarik-o-KHunuk KHak ka paiwand hue hain

hum tol ke lae the jinhen lal-o-gohar mein

yun teri tarah dur ki manzil ke musafir

sab kuchh to nahin chhoD ke jate kabhi ghar mein