humne us zat se lau jab se lagai hui hai

ham ne us zaat se lau jab se lagā.ī huī hai

us kī tasvīr har ik shai meñ samā.ī huī hai

ab use tere sivā kaun bujhā saktā hai

tū ne ye aag jo siine meñ lagā.ī huī hai

kuchh to tārīkī muqaddar meñ milī hai us ko

kuchh ghaTā zulf se is shab ne churā.ī huī hai

gir ga.ī thī jo kisī roz mirī nazroñ se

dil ne ab tak vahī tasvīr uThā.ī huī hai

tere jalvoñ kī ḳhatā hai na adāoñ kā qusūr

dil meñ hasrat ye hamārī hī jagā.ī huī hai

ye jo gulshan meñ sabā phirtī hai itrā.ī huī

us kī ḳhushbū meñ bas ik baar nahā.ī huī hai

ruuh to qaid hai aur jism ko āzādī hai

kyā qayāmat kī hamārī ye rihā.ī huī hai

is meñ poshīda haiñ kuchh aur ma'ānī 'afzal'

dhund sī jo tire ash'ār pe chhā.ī huī hai

hum ne us zat se lau jab se lagai hui hai

us ki taswir har ek shai mein samai hui hai

ab use tere siwa kaun bujha sakta hai

tu ne ye aag jo sine mein lagai hui hai

kuchh to tariki muqaddar mein mili hai us ko

kuchh ghaTa zulf se is shab ne churai hui hai

gir gai thi jo kisi roz meri nazron se

dil ne ab tak wahi taswir uThai hui hai

tere jalwon ki KHata hai na adaon ka qusur

dil mein hasrat ye hamari hi jagai hui hai

ye jo gulshan mein saba phirti hai itrai hui

us ki KHushbu mein bas ek bar nahai hui hai

ruh to qaid hai aur jism ko aazadi hai

kya qayamat ki hamari ye rihai hui hai

is mein poshida hain kuchh aur ma'ani 'afzal'

dhund si jo tere ash'ar pe chhai hui hai