ہم نے یہ بات سب کی زباں سے سنی تو ہے

ہم نے یہ بات سب کی زباں سے سنی تو ہے

اس وقت الجھنوں میں ہر اک آدمی تو ہے

ہم کو سفیر شہر وفا مانتی تو ہے

دنیا یہ ہم کو جانتی پہچانتی تو ہے

قارون کا خزانہ میں لے کر کروں گا کیا

مجھ کو کسی کے پیار کی دولت ملی تو ہے

امید کا چراغ جلاتا ہوں اس لیے

امید کے چراغ میں کچھ روشنی تو ہے

ہر شخص کہہ رہا ہے برا مجھ کو شہر میں

مجھ میں ضرور کوئی نہ کوئی کمی تو ہے

پردے میں تم ہنسی کے چھپاؤ ہزار غم

لیکن تمہاری آنکھوں میں ساحرؔ نمی تو ہے