hum par karega rahmaten parwardigar bhi

ham par karegā rahmateñ parvardigār bhī

hālāt apne hoñge kabhī sāzgār bhī

tū ne bhulā dī chāhateñ qaul-o-qarār bhī

ham muntazir rahe tire sarhad ke paar bhī

hālāñki kar chukā thā vo tark-e-ta.alluqāt

par kaash muḌ ke dekhtā bas ek baar bhī

Derā jamā liyā hai ḳhizāñ ne kuchh is tarah

ab ḳhush na kar sakegī ye fasl-e-bahār bhī

apnī nigāh meñ to rahe surḳh-rū sadā

insāñ meñ honā chāhiye itnā vaqār bhī

ye apne rahnumāoñ ke va.adoñ kā hai asar

be-e'tibār ho gayā ab e'tibār bhī

ye kaisā daur aa gayā 'mīnā' ki ab yahāñ

sikkoñ ke mol biktā hai apnoñ kā pyaar bhī

hum par karega rahmaten parwardigar bhi

haalat apne honge kabhi sazgar bhi

tu ne bhula di chahaten qaul-o-qarar bhi

hum muntazir rahe tere sarhad ke par bhi

haalanki kar chuka tha wo tark-e-talluqat

par kash muD ke dekhta bas ek bar bhi

Dera jama liya hai KHizan ne kuchh is tarah

ab KHush na kar sakegi ye fasl-e-bahaar bhi

apni nigah mein to rahe surKH-ru sada

insan mein hona chahiye itna waqar bhi

ye apne rahnumaon ke wadon ka hai asar

be-e'tibar ho gaya ab e'tibar bhi

ye kaisa daur aa gaya 'mina' ki ab yahan

sikkon ke mol bikta hai apnon ka pyar bhi