hum par nigah-e-lutf kabhi hai kabhi nahin

ham par nigāh-e-lutf kabhī hai kabhī nahīñ

tum hī kaho ye kyā hai magar dil-lagī nahīñ

go jī rahā hai aaj bhī koī tire baġhair

lekin ye zindagī to koī zindagī nahīñ

us kī balā se koī jiye yā koī mare

jis ko kisī ke dard kā ehsās hī nahīñ

dil meñ na aarzū hai koī ab na valvala

ik shaam jal rahī hai magar raushnī nahīñ

āḳhir ham un ke va.adoñ par īmān laa.eñ kyā

jo ham pe mehrbān abhī haiñ abhī nahīñ

is guftugū kī tarz meñ tarmīm kījiye

kab tak maiñ ḳhāmushī se sunūñ aap kī nahīñ

'āsī' zabān-e-ḳhāmushī meñ dāstān-e-shauq

ham ne kahī hai bārhā us ne sunī nahīñ

hum par nigah-e-lutf kabhi hai kabhi nahin

tum hi kaho ye kya hai magar dil-lagi nahin

go ji raha hai aaj bhi koi tere baghair

lekin ye zindagi to koi zindagi nahin

us ki bala se koi jiye ya koi mare

jis ko kisi ke dard ka ehsas hi nahin

dil mein na aarzu hai koi ab na walwala

ek sham jal rahi hai magar raushni nahin

aaKHir hum un ke wadon par iman laen kya

jo hum pe mehrban abhi hain abhi nahin

is guftugu ki tarz mein tarmim kijiye

kab tak main KHamushi se sunun aap ki nahin

'asi' zaban-e-KHamushi mein dastan-e-shauq

hum ne kahi hai barha us ne suni nahin