hum phaDak kar toDte sari qafas ki tiliyan

ham phaḌak kar toḌte saarī qafas kī tīliyāñ

par nahīñ ai ham safīro! apne bas kī tīliyāñ

bahr-e-aivāñ aur banvā chilman ai parda-nashīñ

ho ga.ī bad-rañg haiñ agle baras kī tīliyāñ

ḳhaak meñ nā jins rahte haiñ na ahl-e-imtiyāz

ai falak bantī nahīñ jārūb ḳhas kī tīliyāñ

ain fasl-e-gul meñ hī sayyād-e-be-parvā ne aah

das ke par katre to kiiñ āñkhoñ meñ das kī tīliyāñ

hirs-e-duniyā chāhtī hai ye ki sīm-o-zar kī hoñ

ye charāġh-e-ḳhāna-e-ahl-e-havas kī tīliyāñ

imtiyāz-e-nek-o-bad ḳhud ho na jis ko ai 'nasīr'

us ke nazdīk ek haiñ ḳhāshāk-o-ḳhas kī tīliyāñ

hum phaDak kar toDte sari qafas ki tiliyan

par nahin ai hum safiro! apne bas ki tiliyan

bahr-e-aiwan aur banwa chilman ai parda-nashin

ho gai bad-rang hain agle baras ki tiliyan

KHak mein na jins rahte hain na ahl-e-imtiyaz

ai falak banti nahin jarub KHas ki tiliyan

ain fasl-e-gul mein hi sayyaad-e-be-parwa ne aah

das ke par katre to kin aankhon mein das ki tiliyan

hirs-e-duniya chahti hai ye ki sim-o-zar ki hon

ye charagh-e-KHana-e-ahl-e-hawas ki tiliyan

imtiyaz-e-nek-o-bad KHud ho na jis ko ai 'nasir'

us ke nazdik ek hain KHashak-o-KHas ki tiliyan