hum rah-raw-e-manzil dushwar rahe hain

ham rāh-rav-e-manzil dushvār rahe haiñ

har tarah musībat meñ giraftār rahe haiñ

gah qaid meñ aur gaah sar-e-dār rahe haiñ

ai pyāre vatan tere parastār rahe haiñ

har chand vafāoñ pe lagā.e ga.e ilzām

ai hind magar tere vafādār rahe haiñ

ye baat alag saaqī navāze na navāze

ham mai-kada-e-ishq ke mai-ḳhvār rahe haiñ

jo nang-e-chaman kahte haiñ tārīḳh to dekheñ

ham rūh-e-chaman zīnat-e-gulzār rahe haiñ

ḳhud ahl-e-ḳhirad chhoḌ ga.e rāh-e-vafā ko

ham ahl-e-junūñ sāhib-e-kirdār rahe haiñ

da.avā-e-mohabbat hai jinheñ aaj chaman se

maazī meñ vahī desh ke ġhaddār rahe haiñ

jab jab bhī kaḌā vaqt paḌā apne vatan par

jaañ apnī fidā karne ko tayyār rahe haiñ

duniyā ko sabaq ham ne ahinsā kā paḌhāyā

dushman ke liye āhanī dīvār rahe haiñ

'bebāk' miTā saktā nahīñ ham ko zamāna

ham haq ke liye bar-sar-e-paikār rahe haiñ

hum rah-raw-e-manzil dushwar rahe hain

har tarah musibat mein giraftar rahe hain

gah qaid mein aur gah sar-e-dar rahe hain

ai pyare watan tere parastar rahe hain

har chand wafaon pe lagae gae ilzam

ai hind magar tere wafadar rahe hain

ye baat alag saqi nawaze na nawaze

hum mai-kada-e-ishq ke mai-KHwar rahe hain

jo nang-e-chaman kahte hain tariKH to dekhen

hum ruh-e-chaman zinat-e-gulzar rahe hain

KHud ahl-e-KHirad chhoD gae rah-e-wafa ko

hum ahl-e-junun sahib-e-kirdar rahe hain

dawa-e-mohabbat hai jinhen aaj chaman se

mazi mein wahi desh ke ghaddar rahe hain

jab jab bhi kaDa waqt paDa apne watan par

jaan apni fida karne ko tayyar rahe hain

duniya ko sabaq hum ne ahinsa ka paDhaya

dushman ke liye aahani diwar rahe hain

'bebak' miTa sakta nahin hum ko zamana

hum haq ke liye bar-sar-e-paikar rahe hain