ہم راہ رو منزل دشوار رہے ہیں

ہم راہ رو منزل دشوار رہے ہیں

ہر طرح مصیبت میں گرفتار رہے ہیں

گہہ قید میں اور گاہ سر دار رہے ہیں

اے پیارے وطن تیرے پرستار رہے ہیں

ہر چند وفاؤں پہ لگائے گئے الزام

اے ہند مگر تیرے وفادار رہے ہیں

یہ بات الگ ساقی نوازے نہ نوازے

ہم مے کدۂ عشق کے مے خوار رہے ہیں

جو ننگ چمن کہتے ہیں تاریخ تو دیکھیں

ہم روح چمن زینت گلزار رہے ہیں

خود اہل خرد چھوڑ گئے راہ وفا کو

ہم اہل جنوں صاحب کردار رہے ہیں

دعوائے محبت ہے جنہیں آج چمن سے

ماضی میں وہی دیش کے غدار رہے ہیں

جب جب بھی کڑا وقت پڑا اپنے وطن پر

جاں اپنی فدا کرنے کو تیار رہے ہیں

دنیا کو سبق ہم نے اہنسا کا پڑھایا

دشمن کے لئے آہنی دیوار رہے ہیں

ببیاکؔ مٹا سکتا نہیں ہم کو زمانہ

ہم حق کے لئے بر سر پیکار رہے ہیں