ہم رہ شوق میں گر گر کے سنبھل جائیں گے

ہم رہ شوق میں گر گر کے سنبھل جائیں گے

وہ نظر بدلی تو حالات بدل جائیں گے

نگہ شوق اگر آ گئی اپنی ضد پر

سب حجابات تجلی میں بدل جائیں گے

میری تقدیر میں آ جائیں گے الجھن بن کر

جتنے بل گیسوئے جاناں کے نکل جائیں گے

قافلے والوں کو یہ راز بتا دے کوئی

رہنما بدلے تو رستے بھی بدل جائیں گے

میرے اشکوں سے ذرا دور ہی رہئے ورنہ

آپ کے ہاتھ بھی اس آگ میں جل جائیں گے

اور دو چار قدم کیجئے تکلیف خرام

سر اٹھاتے ہوئے فتنے بھی کچل جائیں گے

یہ جو بد مست مے عیش و طرب ہیں موسیٰؔ

ٹھوکریں کھا کے زمانے کی سنبھل جائیں گے