hum rahe hain pari-jamalon mein

ham rahe haiñ parī-jamāloñ meñ

umr guzrī hai husn vāloñ meñ

hazrat-e-shaiḳh ko ye kyā ma.alūm

kaun sī shai hai in piyāloñ meñ

shab kisī mai-kade meñ kāTeñge

din guzāreñge ḳhush-jamāloñ meñ

husn kuchh bhī javāb de na sakā

'ishq uljhā rahā savāloñ meñ

ab ye mahsūs ho rahā hai mujhe

bas gayā hai koī ḳhayāloñ meñ

ik hasīñ ke tufail ai 'ābid'

apnā charchā hai husn vāloñ meñ

hum rahe hain pari-jamalon mein

umr guzri hai husn walon mein

hazrat-e-shaiKH ko ye kya malum

kaun si shai hai in piyalon mein

shab kisi mai-kade mein kaTenge

din guzarenge KHush-jamalon mein

husn kuchh bhi jawab de na saka

'ishq uljha raha sawalon mein

ab ye mahsus ho raha hai mujhe

bas gaya hai koi KHayalon mein

ek hasin ke tufail ai 'abid'

apna charcha hai husn walon mein