ham-rang laghari se hun gul ki shamim ka

ham-rañg lāġharī se huuñ gul kī shamīm kā

tūfān-e-bād hai mujhe jhoñkā nasīm kā

chhoḌā na kuchh bhī siine meñ tuġhyān-e-ashk ne

apnī hī fauj ho ga.ī lashkar ġhanīm kā

yārān-e-nau ke vāste mujh se ḳhafā hue

tum ko nahīñ hai paas niyāz-e-qadīm kā

yaad aa.ī kāfiroñ ko mirī āh-e-sard kī

kyūñki na kāñpne lage sho.ala jahīm kā

az-bas-ki sabt-e-nāma hai soz-e-tap-e-darūñ

qāsid kā haath hai yad-e-baizā kalīm kā

vaa.iz kabhī hilā nahīñ kū-e-sanam se maiñ

kyā jānūñ kyā hai martaba arsh-e-azīm kā

maarā hai vasl-e-ġhair ke shikve pe chāhiye

madfan judā judā mirī lāsh-e-do-nīm kā

kahtā hai baat baat pe kyuuñ jaan khā ga.e

goyā ki pak gayā hai kaleja nadīm kā

vaa.iz butoñ ko ḳhuld meñ le jā.eñge kahīñ

hai va.ada kāfiroñ se azāb-e-alīm kā

'momin' tujhe to vahb hai momin hī vo nahīñ

jo mo'taqid nahīñ tirī tab-e-salīm kā

ham-rang laghari se hun gul ki shamim ka

tufan-e-baad hai mujhe jhonka nasim ka

chhoDa na kuchh bhi sine mein tughyan-e-ashk ne

apni hi fauj ho gai lashkar ghanim ka

yaran-e-nau ke waste mujh se KHafa hue

tum ko nahin hai pas niyaz-e-qadim ka

yaad aai kafiron ko meri aah-e-sard ki

kyunki na kanpne lage shoala jahim ka

az-bas-ki sabt-e-nama hai soz-e-tap-e-darun

qasid ka hath hai yad-e-baiza kalim ka

waiz kabhi hila nahin ku-e-sanam se main

kya jaanun kya hai martaba arsh-e-azim ka

mara hai wasl-e-ghair ke shikwe pe chahiye

madfan juda juda meri lash-e-do-nim ka

kahta hai baat baat pe kyun jaan kha gae

goya ki pak gaya hai kaleja nadim ka

waiz buton ko KHuld mein le jaenge kahin

hai wada kafiron se azab-e-alim ka

'momin' tujhe to wahb hai momin hi wo nahin

jo mo'taqid nahin teri tab-e-salim ka