ham-rang-o-ham-KHayal mera dil nahin raha

ham-rang-o-ham-ḳhayāl mirā dil nahīñ rahā

maiñ dil ke aur dil mire qābil nahīñ rahā

nazr-e-nigāh-e-nāz huā dil nahīñ rahā

ab ġham ye hai ki maiñ kisī qābil nahīñ rahā

dard ik zarā sā sahne ke qābil nahīñ rahā

dil nāznīñ banā hai mirā dil nahīñ rahā

Duube na the to hasrat-e-sāhil thī barqarār

Duube to phir takaffur-e-sāhil nahīñ nahīñ

thā kaun bā-vafā mujhe kis se umiid thī

hamdard ban ke dard rahā dil nahīñ rahā

huuñ zindagī-e-ġham ki ġham-e-zindagī huuñ maiñ

ab jazba-e-ḳhushī mire qābil nahīñ rahā

aa hī gayā thā ḳhāna-e-dil meñ mire koī

kambaḳht kaise vaqt mirā dil nahīñ rahā

ġham aur ḳhushī haiñ donoñ barābar mire liye

jab iḳhtiyār hī meñ mirā dil nahīñ rahā

bismil kā raqs dekh ke qātil taḌap uThā

ab imtiyāz-e-bismil-o-qātil nahīñ rahā

parvāna jal ke ḳhaak huā sham.a bujh ga.ī

ab aur koī raunaq-e-mahfil nahīñ rahā

itnā qarīb ho ke bhī tarsā karūñ tujhe

shāyad maiñ terī diid ke qābil nahīñ rahā

sāhil ko apne chhoḌ ke naav aage baḌh ga.ī

lauTe baġhair phir koī sāhil nahīñ rahā

ġham ne 'zakī' dikhā.ī hai vo rāh-e-zindagī

jiinā hamāre vāste mushkil nahīñ rahā

ham-rang-o-ham-KHayal mera dil nahin raha

main dil ke aur dil mere qabil nahin raha

nazr-e-nigah-e-naz hua dil nahin raha

ab gham ye hai ki main kisi qabil nahin raha

dard ek zara sa sahne ke qabil nahin raha

dil naznin bana hai mera dil nahin raha

Dube na the to hasrat-e-sahil thi barqarar

Dube to phir takaffur-e-sahil nahin nahin

tha kaun ba-wafa mujhe kis se umid thi

hamdard ban ke dard raha dil nahin raha

hun zindagi-e-gham ki gham-e-zindagi hun main

ab jazba-e-KHushi mere qabil nahin raha

aa hi gaya tha KHana-e-dil mein mere koi

kambaKHt kaise waqt mera dil nahin raha

gham aur KHushi hain donon barabar mere liye

jab iKHtiyar hi mein mera dil nahin raha

bismil ka raqs dekh ke qatil taDap uTha

ab imtiyaz-e-bismil-o-qatil nahin raha

parwana jal ke KHak hua shama bujh gai

ab aur koi raunaq-e-mahfil nahin raha

itna qarib ho ke bhi tarsa karun tujhe

shayad main teri did ke qabil nahin raha

sahil ko apne chhoD ke naw aage baDh gai

lauTe baghair phir koi sahil nahin raha

gham ne 'zaki' dikhai hai wo rah-e-zindagi

jina hamare waste mushkil nahin raha