ham-sae se talab karun pani ke baad kya

ham-sā.e se talab karūñ paanī ke ba.ad kyā

rahtā hai hosh naql-e-makānī ke ba.ad kyā

ye kaisī toḌ phoḌ hai shahr-e-vujūd meñ

ātañk mach gayā hai javānī ke ba.ad kyā

paanī ke paañv kāTne pe tul ga.e ho tum

dariyā meñ bach rahegā ravānī ke ba.ad kyā

bātoñ ke saath muñh se Tapakne lagā hai ḳhuuñ

mar jā.uñgā maiñ hijr-bayānī ke ba.ad kiyā

un ko batā.uñgā jinheñ hūroñ se ishq hai

dar-asl hogā ālam-e-fānī ke ba.ad kyā

maiñ dekhtā huuñ aañkh meñ ḳhvāboñ kī mayyateñ

tum dekhte ho ashk-fishānī ke ba.ad kyā

sheroñ pe zulm karte haiñ jo jānte nahīñ

karnā hai kaam misra-e-sānī ke ba.ad kyā

kyuuñ lafz lafz khodte ho sher ko 'kabīr'

shā.ir nikālnā hai ma.ānī ke ba.ad kyā

ham-sae se talab karun pani ke baad kya

rahta hai hosh naql-e-makani ke baad kya

ye kaisi toD phoD hai shahr-e-wujud mein

aatank mach gaya hai jawani ke baad kya

pani ke panw kaTne pe tul gae ho tum

dariya mein bach rahega rawani ke baad kya

baaton ke sath munh se Tapakne laga hai KHun

mar jaunga main hijr-bayani ke baad kiya

un ko bataunga jinhen huron se ishq hai

dar-asl hoga aalam-e-fani ke baad kya

main dekhta hun aankh mein KHwabon ki mayyaten

tum dekhte ho ashk-fishani ke baad kya

sheron pe zulm karte hain jo jaante nahin

karna hai kaam misra-e-sani ke baad kya

kyun lafz lafz khodte ho sher ko 'kabir'

shair nikalna hai maani ke baad kya