hum sans bhi lene ke saza-war na Thahre

ham saañs bhī lene ke sazā-vār na Thahre

maazī ke ḳharābe kī bhī dīvār na Thahre

sau baar dhuāñ phuul ke siine se uThā hai

bādal ke qadam baaġh meñ ik baar na Thahre

yuuñ merī ummīdoñ ke mahal ho ga.e mismār

jis tarah koī ret kī dīvār na Thahre

pahuñchā na.e hālāt ke dhāre pe safīna

mumkin hai mire haath meñ patvār na Thahre

chhīne liye jaatī haiñ gulistāñ kī havā.eñ

ham barg-e-fasurda ke bhī haqdār na Thahre

ai vaqt-e-ravāñ ham haiñ tere saath abhī tak

Thahreñ jo kahīñ ham tirā me.aar na Thahre

hālāt ke chehre pe damaktī rahe surḳhī

ristā huā ḳhūn-e-dil-e-fankār na Thahre

ai jalva-e-ḳhāmosh tire shīsh-mahal par

ik saañs kī dastak bhī kahīñ baar na Thahre

maskan mirā us rāh-e-havādis meñ hai 'nāzish'

jis jāda-e-pur-haul meñ kohsār na Thahre

hum sans bhi lene ke saza-war na Thahre

mazi ke KHarabe ki bhi diwar na Thahre

sau bar dhuan phul ke sine se uTha hai

baadal ke qadam bagh mein ek bar na Thahre

yun meri ummidon ke mahal ho gae mismar

jis tarah koi ret ki diwar na Thahre

pahuncha nae haalat ke dhaare pe safina

mumkin hai mere hath mein patwar na Thahre

chhine liye jati hain gulistan ki hawaen

hum barg-e-fasurda ke bhi haqdar na Thahre

ai waqt-e-rawan hum hain tere sath abhi tak

Thahren jo kahin hum tera mear na Thahre

haalat ke chehre pe damakti rahe surKHi

rista hua KHun-e-dil-e-fankar na Thahre

ai jalwa-e-KHamosh tere shish-mahal par

ek sans ki dastak bhi kahin bar na Thahre

maskan mera us rah-e-hawadis mein hai 'nazish'

jis jada-e-pur-haul mein kohsar na Thahre