ham-safar ab mere pahlu mein mera dil na raha

ham-safar ab mire pahlū meñ mirā dil na rahā

jis meñ tū garm-e-safar thā vahī mahmil na rahā

kis kī ummīd pe laḌtā phirūñ tūfānoñ se

muntazir ab mirā koī lab-e-sāhil na rahā

jis pe mar mar ke hameñ Dhang se jiinā aayā

kyā kareñ ab sar-e-maqtal vahī qātil na rahā

ab ḳhayālāt kī mahfil bhī nahīñ saj paatī

dil-e-tanhā meñ koī raunaq-e-mahfil na rahā

jāñ-ba-lab yuuñ bhī mujhe hijr ne kar Daalā hai

ai mirī maut tirā kaam bhī mushkil na rahā

aaj ke daur meñ apnoñ se shikāyat kaisī

saath apnā bhī vafā meñ hameñ hāsil na rahā

nāz-o-andāz meñ hai naḳhvat-o-pindār kī bū

shāyad ā.īna koī us ke muqābil na rahā

be-vafā kitnā vafādār rahā terā ḳhayāl

ek lamha bhī mire haal se ġhāfil na rahā

jo tire husn kā munkir thā vo mazmūn kabhī

mere afkār ke unvān meñ shāmil na rahā

dhaḌkanoñ meñ na koī kaif na halchal hai 'mujīb'

tarz-e-avval kī ravish par dil-e-bismil na rahā

ham-safar ab mere pahlu mein mera dil na raha

jis mein tu garm-e-safar tha wahi mahmil na raha

kis ki ummid pe laDta phirun tufanon se

muntazir ab mera koi lab-e-sahil na raha

jis pe mar mar ke hamein Dhang se jina aaya

kya karen ab sar-e-maqtal wahi qatil na raha

ab KHayalat ki mahfil bhi nahin saj pati

dil-e-tanha mein koi raunaq-e-mahfil na raha

jaan-ba-lab yun bhi mujhe hijr ne kar Dala hai

ai meri maut tera kaam bhi mushkil na raha

aaj ke daur mein apnon se shikayat kaisi

sath apna bhi wafa mein hamein hasil na raha

naz-o-andaz mein hai naKHwat-o-pindar ki bu

shayad aaina koi us ke muqabil na raha

be-wafa kitna wafadar raha tera KHayal

ek lamha bhi mere haal se ghafil na raha

jo tere husn ka munkir tha wo mazmun kabhi

mere afkar ke unwan mein shamil na raha

dhaDkanon mein na koi kaif na halchal hai 'mujib'

tarz-e-awwal ki rawish par dil-e-bismil na raha