ham-safar gum raste na-paid ghabraata hun main

ham-safar gum rāste nā-paid ghabrātā huuñ maiñ

ik bayābāñ dar bayābāñ hai jidhar jaatā huuñ maiñ

bazm-e-fikr o hosh ho yā mahfil-e-aish o nashāt

har jagah se chand nishtar chand ġham laatā huuñ maiñ

aa ga.ī ai nā-murādī vo bhī manzil aa ga.ī

mujh ko kyā samjhā.eñge vo un ko samjhātā huuñ maiñ

un ke lab par hai jo halke se tabassum kī jhalak

us meñ apne āñsuoñ kā soz bhī paatā huuñ maiñ

shām-e-tanhā.ī bujhā de jhilmilātī sham' bhī

in añdheroñ meñ hī aksar raushnī paatā huuñ maiñ

himmat-afzā hai har ik uftād rāh-e-shauq kī

Thokareñ khātā huuñ girtā huuñ sambhal jaatā huuñ maiñ

un ke dāman tak ḳhud apnā haath bhī baḌhtā nahīñ

apnā dāman ho to har kāñTe se uljhātā huuñ maiñ

shauq-e-manzil ham-safar hai jazba-e-dil rāhbar

mujh pe ḳhud bhī khul nahīñ paatā kidhar jaatā huuñ maiñ

ham-safar gum raste na-paid ghabraata hun main

ek bayaban dar bayaban hai jidhar jata hun main

bazm-e-fikr o hosh ho ya mahfil-e-aish o nashat

har jagah se chand nishtar chand gham lata hun main

aa gai ai na-muradi wo bhi manzil aa gai

mujh ko kya samjhaenge wo un ko samjhata hun main

un ke lab par hai jo halke se tabassum ki jhalak

us mein apne aansuon ka soz bhi pata hun main

sham-e-tanhai bujha de jhilmilati sham' bhi

in andheron mein hi aksar raushni pata hun main

himmat-afza hai har ek uftad rah-e-shauq ki

Thokaren khata hun girta hun sambhal jata hun main

un ke daman tak KHud apna hath bhi baDhta nahin

apna daman ho to har kanTe se uljhata hun main

shauq-e-manzil ham-safar hai jazba-e-dil rahbar

mujh pe KHud bhi khul nahin pata kidhar jata hun main