ham-safar ham-raaz hamdam koi ham-saya nahin

ham-safar ham-rāz hamdam koī ham-sāya nahīñ

tanhā thā lekin kisī tūfāñ se ghabrāyā nahīñ

bin tire lagtā hai jaise ziist tā-hadd-e-nazar

aisā sahrā hai ki jis meñ duur tak saaya nahīñ

laakh chāhā kaaT duuñ hañste hañsāte zindagī

ye hunar lekin mujhe tā-zindagī aayā nahīñ

raaz ban kar rah gayā aañsū bahāne kā sabab

us ne bhī pūchhā nahīñ maiñ ne bhī batlāyā nahīñ

justujū-e-husn meñ nā-kāmyābī hī rahī

kitnī 'umreñ kaT ga.iiñ is kā pata paayā nahīñ

haiñ sabhī hairān jaane aisā kyā hai dosto

jo gayā mahfil meñ un kī lauT kar aayā nahīñ

pyaar thā terā jo mujh ko raah dikhlātā rahā

moh-māyā ne vagarna kis ko bhaTkāyā nahīñ

zindagī us shaḳhs kī be-mā'nī-o-matlab hai dost

aaj kī duniyā meñ jis ke paas sarmāya nahīñ

yaad meñ achchhe dinoñ kī kyoñ hue 'gulshan' udaas

kaun sā vo phuul hai jo khil ke murjhāyā nahīñ

ham-safar ham-raaz hamdam koi ham-saya nahin

tanha tha lekin kisi tufan se ghabraya nahin

bin tere lagta hai jaise zist ta-hadd-e-nazar

aisa sahra hai ki jis mein dur tak saya nahin

lakh chaha kaT dun hanste hansate zindagi

ye hunar lekin mujhe ta-zindagi aaya nahin

raaz ban kar rah gaya aansu bahane ka sabab

us ne bhi puchha nahin main ne bhi batlaya nahin

justuju-e-husn mein na-kaamyabi hi rahi

kitni 'umren kaT gain is ka pata paya nahin

hain sabhi hairan jaane aisa kya hai dosto

jo gaya mahfil mein un ki lauT kar aaya nahin

pyar tha tera jo mujh ko rah dikhlata raha

moh-maya ne wagarna kis ko bhaTkaya nahin

zindagi us shaKHs ki be-ma'ni-o-matlab hai dost

aaj ki duniya mein jis ke pas sarmaya nahin

yaad mein achchhe dinon ki kyon hue 'gulshan' udas

kaun sa wo phul hai jo khil ke murjhaya nahin