ham-safar yaad hain uske jo safar KHatm hua

ham-safar yaad haiñ us ke jo safar ḳhatm huā

jaane kab kaun sī sāzish ho ye Dar ḳhatm huā

be-sabab sab ko hī sabqat ke junūñ ne maarā

aise bikhre haiñ ki rishtoñ kā asar ḳhatm huā

e.atibār uThte hī ye kaisā taġhayyur aayā

dil kā vīrān makāñ rah gayā ghar ḳhatm huā

shāḳh hī shāḳh kī dushman thī samar kyā detā

phūlne-phalne se pahle hī shajar ḳhatm huā

jāntā thā ki mire giit bhī kho jā.eñge

terā mujh se jo ta.alluq thā agar ḳhatm huā

ham to maa.il the ba-har-hāl lahū dene par

ik tirī tarz-e-taġhāful se jigar ḳhatm huā

us ko bas mujh ko Dubone hī kī zid thī shāyad

maiñ jo Duubā to mire saath bhañvar ḳhatm huā

ham-safar yaad hain us ke jo safar KHatm hua

jaane kab kaun si sazish ho ye Dar KHatm hua

be-sabab sab ko hi sabqat ke junun ne mara

aise bikhre hain ki rishton ka asar KHatm hua

eatibar uThte hi ye kaisa taghayyur aaya

dil ka viran makan rah gaya ghar KHatm hua

shaKH hi shaKH ki dushman thi samar kya deta

phulne-phalne se pahle hi shajar KHatm hua

jaanta tha ki mere git bhi kho jaenge

tera mujh se jo talluq tha agar KHatm hua

hum to mail the ba-har-haal lahu dene par

ek teri tarz-e-taghaful se jigar KHatm hua

us ko bas mujh ko Dubone hi ki zid thi shayad

main jo Duba to mere sath bhanwar KHatm hua