ham-sar-e-zulf qad-e-hur-e-shamail Thahra

ham-sar-e-zulf qad-e-hūr-e-shamā.il Thahrā

laam kā ḳhuub alif madd-e-muqābil Thahrā

dīda-e-tar se jo dāman meñ girā dil Thahrā

bahte bahte ye safīna lab-e-sāhil Thahrā

kī nazar rū-e-kitābī pe to kuchh dil Thahrā

maktab-e-shauq bhī qur.ān kī manzil Thahrā

nighat-e-gul se pareshān huā us kā dimāġh

ḳhanda-e-gul na huā shor-e-anādil Thahrā

najd se qais jo aayā mare zindāñ kī taraf

der tak gosh-bar-āvāz-e-salāsil Thahrā

husn jis tifl kā chamkā vo huā bā.is-e-qatl

jis ne talvār sambhālī mirā qātil Thahrā

ḳhat jo niklā ruḳh-e-jānāñ pe milā bosa-e-ḳhāl

yahī daana faqat is kisht kā hāsil Thahrā

alam ik nuqta jo mash.hūr thā ai josh-e-junūñ

ġhaur se kī jo nazar nuqta-e-bātil Thahrā

duur jab tak the taḌaptā thā meñ kaisā kaisā

paas aa kar vo jo Thahre to mirā dil Thahrā

kasrat-e-dāġh se gul-dasta banā dil to kyā

zīnat-e-bāġh na ārā.ish-e-mahfil Thahrā

dauḌtā qais bhī aatā hai nihāyat hī qarīb

ik zarā naaqe ko ai sāhib-e-mahmil Thahrā

dam jo betāb thā muddat se mire siine meñ

teġh-e-qātil ke tale kuchh dam-e-bismil Thahrā

ham baḌī duur se aa.e haiñ tumhārā hai ye haal

ghar se darvāze tak aanā ka.ī manzil Thahrā

ab tak aatī hai sadā turbat-e-lailā se 'amīr'

sārbān ab to ḳhudā ke liye mahmil Thahrā

ham-sar-e-zulf qad-e-hur-e-shamail Thahra

lam ka KHub alif madd-e-muqabil Thahra

dida-e-tar se jo daman mein gira dil Thahra

bahte bahte ye safina lab-e-sahil Thahra

ki nazar ru-e-kitabi pe to kuchh dil Thahra

maktab-e-shauq bhi quran ki manzil Thahra

nighat-e-gul se pareshan hua us ka dimagh

KHanda-e-gul na hua shor-e-anadil Thahra

najd se qais jo aaya mare zindan ki taraf

der tak gosh-bar-awaz-e-salasil Thahra

husn jis tifl ka chamka wo hua bais-e-qatl

jis ne talwar sambhaali mera qatil Thahra

KHat jo nikla ruKH-e-jaanan pe mila bosa-e-KHal

yahi dana faqat is kisht ka hasil Thahra

alam ek nuqta jo mashhur tha ai josh-e-junun

ghaur se ki jo nazar nuqta-e-baatil Thahra

dur jab tak the taDapta tha mein kaisa kaisa

pas aa kar wo jo Thahre to mera dil Thahra

kasrat-e-dagh se gul-dasta bana dil to kya

zinat-e-bagh na aaraish-e-mahfil Thahra

dauDta qais bhi aata hai nihayat hi qarib

ek zara naqe ko ai sahib-e-mahmil Thahra

dam jo betab tha muddat se mere sine mein

tegh-e-qatil ke tale kuchh dam-e-bismil Thahra

hum baDi dur se aae hain tumhaara hai ye haal

ghar se darwaze tak aana kai manzil Thahra

ab tak aati hai sada turbat-e-laila se 'amir'

sarban ab to KHuda ke liye mahmil Thahra