ہم سے افسانے محبت کے سنائے نہ گئے

ہم سے افسانے محبت کے سنائے نہ گئے

داغ دل ایسے بھی تھے ان کو دکھائے نہ گئے

بات کچھ بھی نہ ہوئی تھی کہ وہ ہوتے نالاں

کون سی بات تھی ہم جس پہ رلائے نہ گئے

اے مرے دوست تری نظر کرم ہے شاید

تو نے جو غم بھی دئے تھے وہ چھپائے نہ گئے

ہم نے چاہا تھا کہ کچھ بھی نہ رہے یاد ہمیں

نہ ہی تم یاد رہے اور بھلائے نہ گئے

حالت وصل میں ہم اس کے سوا کیا کرتے

اشک آنکھوں میں جو ٹھہرے وہ بہائے نہ گئے

بسکہ اک درد محبت ہی نہیں تھا برہمؔ

کیا سے کیا زخم تھے جو ہم پہ لگائے نہ گئے