humse jaise bhi hua waqt guzara apna

ham se jaise bhī huā vaqt guzārā apnā

varna is kār-gah-e-dahr meñ kyā thā apnā

kaise pahchāne hameñ koī shanāsā apnā

baat apnī hai na āvāz na lahja apnā

'ahd-e-'ishrat kā bhalā ho ki sabhī the apne

ab akele haiñ kisī se nahīñ rishta apnā

ho ḳhud apnā bhī na apnā to kareñ kis se gila

aur ho jaa.e to ho jaa.e parāyā apnā

paañv jis samt ko uThte haiñ chale jaate haiñ

koī rahbar hai na manzil hai na rasta apnā

us ko ā.īna dikhāne kī tamanna thī hameñ

Dar ga.e dekh ke ā.īne meñ chehra apnā

shām-e-ġhurbat meñ nahīñ saaya bhī saath ai 'afzal'

haa.e har vaqt kā sāthī bhī na niklā apnā

hum se jaise bhi hua waqt guzara apna

warna is kar-gah-e-dahr mein kya tha apna

kaise pahchane hamein koi shanasa apna

baat apni hai na aawaz na lahja apna

'ahd-e-'ishrat ka bhala ho ki sabhi the apne

ab akele hain kisi se nahin rishta apna

ho KHud apna bhi na apna to karen kis se gila

aur ho jae to ho jae paraya apna

panw jis samt ko uThte hain chale jate hain

koi rahbar hai na manzil hai na rasta apna

us ko aaina dikhane ki tamanna thi hamein

Dar gae dekh ke aaine mein chehra apna

sham-e-ghurbat mein nahin saya bhi sath ai 'afzal'

hae har waqt ka sathi bhi na nikla apna