ہم سے جیسے بھی ہوا وقت گزارا اپنا

ہم سے جیسے بھی ہوا وقت گزارا اپنا

ورنہ اس کار گہہ دہر میں کیا تھا اپنا

کیسے پہچانے ہمیں کوئی شناسا اپنا

بات اپنی ہے نہ آواز نہ لہجہ اپنا

عہد عشرت کا بھلا ہو کہ سبھی تھے اپنے

اب اکیلے ہیں کسی سے نہیں رشتہ اپنا

ہو خود اپنا بھی نہ اپنا تو کریں کس سے گلہ

اور ہو جائے تو ہو جائے پرایا اپنا

پاؤں جس سمت کو اٹھتے ہیں چلے جاتے ہیں

کوئی رہبر ہے نہ منزل ہے نہ رستہ اپنا

اس کو آئینہ دکھانے کی تمنا تھی ہمیں

ڈر گئے دیکھ کے آئینے میں چہرہ اپنا

شام غربت میں نہیں سایہ بھی ساتھ اے افضلؔ

ہائے ہر وقت کا ساتھی بھی نہ نکلا اپنا