humse jo ahd tha wo ahd-shikan bhul gaya

ham se jo ahd thā vo ahd-shikan bhuul gayā

apne ushshāq ko vo ġhuncha-dahan bhuul gayā

qais kā jalva-e-lailā jo huā hosh-rubā

vo sarāsīma huā najd kā ban bhuul gayā

kyā karishma ye tirī chashm-e-suḳhan-go ne kiyā

kis kī jānib thā mirā rū-e-suḳhan bhuul gayā

ḳhaar ḳhār-e-ġham-e-ulfat ne kiyā raah ġhalat

terā mad.hosh-e-nazar rāh-e-chaman bhuul gayā

nigah-e-shauq ne dīvāna banāyā mujh ko

kuchh ḳhabar apnī nahīñ hai hama-tan bhuul gayā

ho gayā hosh-rubā husn-e-fareb-e-ālam

nal jo baazī meñ lagā ishq-e-daman bhuul gayā

shauq-o-ram tere jo dekhe haiñ ġhazāl-e-ra.anā

chaukḌī apnī bayābāñ meñ hiran bhuul gayā

sair-e-gulzār meñ hai mahv-e-tamāshā vo gul

bulbul-e-shefta ko ġhuncha-dahan bhuul gayā

sabza-e-ḳhat ne tire raah meñ gherā mujh ko

ġharq maiñ ho na sakā chāh-e-zaqan bhuul gayā

mahv hotā hī nahīñ is kā kabhī dil se ḳhayāl

yaad kartā hī nahīñ mushfiq-e-man bhuul gayā

shāhid-e-mast ne sarmast kiyā hai 'sāqī'

ham vo mad.hosh hue rañg-e-suḳhan bhuul gayā

hum se jo ahd tha wo ahd-shikan bhul gaya

apne ushshaq ko wo ghuncha-dahan bhul gaya

qais ka jalwa-e-laila jo hua hosh-ruba

wo sarasima hua najd ka ban bhul gaya

kya karishma ye teri chashm-e-suKHan-go ne kiya

kis ki jaanib tha mera ru-e-suKHan bhul gaya

KHar KHar-e-gham-e-ulfat ne kiya rah ghalat

tera madhosh-e-nazar rah-e-chaman bhul gaya

nigah-e-shauq ne diwana banaya mujh ko

kuchh KHabar apni nahin hai hama-tan bhul gaya

ho gaya hosh-ruba husn-e-fareb-e-alam

nal jo bazi mein laga ishq-e-daman bhul gaya

shauq-o-ram tere jo dekhe hain ghazal-e-rana

chaukDi apni bayaban mein hiran bhul gaya

sair-e-gulzar mein hai mahw-e-tamasha wo gul

bulbul-e-shefta ko ghuncha-dahan bhul gaya

sabza-e-KHat ne tere rah mein ghera mujh ko

gharq main ho na saka chah-e-zaqan bhul gaya

mahw hota hi nahin is ka kabhi dil se KHayal

yaad karta hi nahin mushfiq-e-man bhul gaya

shahid-e-mast ne sarmast kiya hai 'saqi'

hum wo madhosh hue rang-e-suKHan bhul gaya