humse mumkin na hua dasht ko dariya likkhen

ham se mumkin na huā dasht ko dariyā likkheñ

ḳhaar ko phuul kaheñ dhuup ko saaya likkheñ

un kā isrār añdhere ko ujālā likkho

zid hamārī ki añdherā hai añdherā likkheñ

aao is peḌ ke saa.e meñ zarā sustā leñ

aur phir chāhe ġhazal chāhe qasīda likkheñ

kuchh patā un ko chale ham pe guzartī kyā hai

apne ik aadh sahī ġham kā ḳhulāsa likkheñ

us ke har harf se ḳhushbū sī tumhārī mahke

yā rubā.ī yā koī sher ġhazal kā likkheñ

kyā kareñ phuul se kāġhaz pe bikhar jaate haiñ

jab bhī chāhā hai kabhī un kā sarāpā likkheñ

chāñdnī raat meñ baiTheñ lab-e-dariyā pe kahīñ

aur har mauj pe bas naam tumhārā likkheñ

us kī hastī ki hai ābād mahaktā sā jahāñ

aur ham ḳhud ko samundar meñ jazīra likkheñ

ham ko is ahd-e-kashākash ko raqam karnā hai

kis ko fursat ki bhalā aap kā qissa likkheñ

kyā diyā tum ne zamāne ko bas ik shab ke sivā

ham ne sochā hai ki us shab kā saverā likkheñ

tum ne ik moḌ pe lā ke jise chhoḌā thā kabhī

aao ab baiTh ke qissa vo adhūrā likkheñ

dil se majbūr haiñ 'jāved' magar haif kahāñ

kyā ye mumkin hai kabhī aap ko apnā likkheñ

hum se mumkin na hua dasht ko dariya likkhen

KHar ko phul kahen dhup ko saya likkhen

un ka israr andhere ko ujala likkho

zid hamari ki andhera hai andhera likkhen

aao is peD ke sae mein zara susta len

aur phir chahe ghazal chahe qasida likkhen

kuchh pata un ko chale hum pe guzarti kya hai

apne ek aadh sahi gham ka KHulasa likkhen

us ke har harf se KHushbu si tumhaari mahke

ya rubai ya koi sher ghazal ka likkhen

kya karen phul se kaghaz pe bikhar jate hain

jab bhi chaha hai kabhi un ka sarapa likkhen

chandni raat mein baiThen lab-e-dariya pe kahin

aur har mauj pe bas nam tumhaara likkhen

us ki hasti ki hai aabaad mahakta sa jahan

aur hum KHud ko samundar mein jazira likkhen

hum ko is ahd-e-kashakash ko raqam karna hai

kis ko fursat ki bhala aap ka qissa likkhen

kya diya tum ne zamane ko bas ek shab ke siwa

hum ne socha hai ki us shab ka sawera likkhen

tum ne ek moD pe la ke jise chhoDa tha kabhi

aao ab baiTh ke qissa wo adhura likkhen

dil se majbur hain 'jawed' magar haif kahan

kya ye mumkin hai kabhi aap ko apna likkhen