ہم سے نہ پوچھیے کہ کدھر دیکھتے رہے

ہم سے نہ پوچھیے کہ کدھر دیکھتے رہے

تھی دیکھنے کی چیز جدھر دیکھتے رہے

اہل ہوس کو دید میسر نہیں ہوئی

جلوے کو ان کے اہل نظر دیکھتے رہے

دیکھا تو کام کا کوئی دن تھا نہ رات تھی

ہم زندگی کے شام و سحر دیکھتے رہے

آتی رہی ہمیں پہ مصیبت تمام عمر

ہم اپنی آہ کا یہ اثر دیکھتے رہے

دن رات ایک جلوۂ دیدار تھا نصیب

ہم روشنیٔ شمس و قمر دیکھتے رہے

جلوہ بوقت دید رہا جاذب نظر

ہم ہوش میں نہیں تھے مگر دیکھتے رہے

نالوں سے آگ سی تھی شب غم لگی ہوئی

ہم اپنے گھر میں رقص شرر دیکھتے رہے

اہل نظر کہاں تھی ہماری نظر کہاں

ہم بزم میں کہاں تھے کدھر دیکھتے رہے

لٹتی رہی جہان میں خوشترؔ کی زندگی

ہم تھے کہ اس کو شام و سحر دیکھتے رہے