humse to rah-o-rasm hai aghyar ki tarah

ham se to rāh-o-rasm hai aġhyār kī tarah

duniyā pe mehrbān haiñ ġham-ḳhvār kī tarah

kam-mā.egī na pūchh mirī bazm-e-ġhair meñ

uThtī hai har nigāh ḳharīdār kī tarah

maiñ tājirān-e-ishq ke baare meñ kyā kahūñ

in kā junūñ hai garmī-e-bāzār kī tarah

ḳhud-sāḳhta butoñ ko maiñ ab toḌ-tāḌ kar

pūjūñgā bas usī ko parastār kī tarah

zauq-e-nazar ko aap samajhte haiñ gar gunāh

nādim khaḌā huuñ maiñ bhī gunahgār kī tarah

dekhī hai maiñ ne shāḳh se pattoñ kī ruḳhsatī

jaane na dūñgā ab tujhe har baar kī tarah

zād-e-safar kī fikr na manzil kā ho ḳhayāl

rāh-e-talab meñ aao talabgār kī tarah

chāhā hai tum ko yuuñ ki tumheñ bhī ḳhabar na ho

sochā hai tum ko an-kahe ash.ār kī tarah

kahne ko koī band-o-salāsil nahīñ magar

sab haiñ fasīl-e-jāñ meñ giraftār kī tarah

'ādil' ruḳh-e-nigār nahīñ dil kā aa.ina

iqrār-e-ḳhās hotā hai inkār kī tarah

hum se to rah-o-rasm hai aghyar ki tarah

duniya pe mehrban hain gham-KHwar ki tarah

kam-maegi na puchh meri bazm-e-ghair mein

uThti hai har nigah KHaridar ki tarah

main tajiran-e-ishq ke bare mein kya kahun

in ka junun hai garmi-e-bazar ki tarah

KHud-saKHta buton ko main ab toD-taD kar

pujunga bas usi ko parastar ki tarah

zauq-e-nazar ko aap samajhte hain gar gunah

nadim khaDa hun main bhi gunahgar ki tarah

dekhi hai main ne shaKH se patton ki ruKHsati

jaane na dunga ab tujhe har bar ki tarah

zad-e-safar ki fikr na manzil ka ho KHayal

rah-e-talab mein aao talabgar ki tarah

chaha hai tum ko yun ki tumhein bhi KHabar na ho

socha hai tum ko an-kahe ashaar ki tarah

kahne ko koi band-o-salasil nahin magar

sab hain fasil-e-jaan mein giraftar ki tarah

'adil' ruKH-e-nigar nahin dil ka aaina

iqrar-e-KHas hota hai inkar ki tarah