humse wafa karen ki wo hum par jafa karen

ham se vafā kareñ ki vo ham par jafā kareñ

paa.eñ ḳhudā se ham jo butoñ se daġhā kareñ

sayyād uḌā diyā mujhe sar se utaar kar

sadqe tire humā tire sar par uḌā kareñ

vo din ḳhudā dikhā.e ki ham bhī unheñ satā.eñ

ye nāznīñ hasīn hamārā gilā kareñ

āñkhoñ meñ ashk aa.e to hañsne kā lutf kyā

itnā na gudgudāo ki ham ro diyā kareñ

samjhā de jā ke tū hī unheñ ai nigāh-e-yās

ab kosne kā vaqt nahīñ hai duā kareñ

rakh leñ ham aap laao dil-e-be-qarār meñ

aisā na ho ki tiir tumhāre ḳhatā kareñ

ham laakh pārsāoñ ke ik pārsā sahī

mauqe se tum ko paa.eñ to batlāo kyā kareñ

pazhmurda phuul ban ke rahe nā-murād dil

khil kar tumhāre haar kī kaliyāñ hañsā kareñ

vo din kahāñ 'riyāz' vo rāteñ kahāñ 'riyāz'

baiThe hue kisī kī balā.eñ liyā kareñ

hum se wafa karen ki wo hum par jafa karen

paen KHuda se hum jo buton se dagha karen

sayyaad uDa diya mujhe sar se utar kar

sadqe tere huma tere sar par uDa karen

wo din KHuda dikhae ki hum bhi unhen sataen

ye naznin hasin hamara gila karen

aankhon mein ashk aae to hansne ka lutf kya

itna na gudgudao ki hum ro diya karen

samjha de ja ke tu hi unhen ai nigah-e-yas

ab kosne ka waqt nahin hai dua karen

rakh len hum aap lao dil-e-be-qarar mein

aisa na ho ki tir tumhaare KHata karen

hum lakh parsaon ke ek parsa sahi

mauqe se tum ko paen to batlao kya karen

pazhmurda phul ban ke rahe na-murad dil

khil kar tumhaare haar ki kaliyan hansa karen

wo din kahan 'riyaz' wo raaten kahan 'riyaz'

baiThe hue kisi ki balaen liya karen