hum shad hon kya jab tak aazar salamat hai

ham shaad hoñ kyā jab tak āzār salāmat hai

sar phoḌ chuke phir bhī dīvār salāmat hai

aayā tire hoñToñ par elān-e-junūñ kyuuñ kar

jab tere garebāñ kā har taar salāmat hai

andāz dikhā.e haiñ kyā shoḳhī-e-tiflāñ ne

is shahr meñ ab kis kī dīvār salāmat hai

luTtā hai to luT jaa.e sukh-chain faqīroñ kā

kyā fikr tujhe terā pindār salāmat hai

ik sañg ke ha.Tne se ḳhush-fahm na ho itnā

mat bhuul ki raste meñ kohsār salāmat hai

'gulzār' hameñ dekho kashtī ko Dubo kar bhī

kis faḳhr se kahte haiñ patvār salāmat hai

hum shad hon kya jab tak aazar salamat hai

sar phoD chuke phir bhi diwar salamat hai

aaya tere honTon par elan-e-junun kyun kar

jab tere gareban ka har tar salamat hai

andaz dikhae hain kya shoKHi-e-tiflan ne

is shahr mein ab kis ki diwar salamat hai

luTta hai to luT jae sukh-chain faqiron ka

kya fikr tujhe tera pindar salamat hai

ek sang ke haTne se KHush-fahm na ho itna

mat bhul ki raste mein kohsar salamat hai

'gulzar' hamein dekho kashti ko Dubo kar bhi

kis faKHr se kahte hain patwar salamat hai