hum shoala-ba-dast itni mohabbat se jale hain

ham sho.ala-ba-dast itnī mohabbat se jale haiñ

jo dekhne vaale the vo hasrat se jale haiñ

ḳhushbū se jale haiñ kabhī sūrat se jale haiñ

bad-ḳhvāh hasad karne kī aadat se jale haiñ

jal jaa.e jahāñ ḳhuun nahīñ khaultā un kā

ham barf-zada logoñ kī fitrat se jale haiñ

kab sho.alagī lau dene se aa.ī hai kabhī baaz

ye husn-e-nazar vaale ināyat se jale haiñ

ik aag ke dariyā ko batāyā hai chaman-zār

ham Dūbne vāloñ kī ri.āyat se jale haiñ

kirdār pe aane hī nahīñ dī hai kabhī aañch

kuchh log mohabbat meñ mahārat se jale haiñ

is aag meñ rāhat ke bhī sāmān haiñ 'jāzib'

samjhā.eñ bhī kaise ki zarūrat se jale haiñ

hum shoala-ba-dast itni mohabbat se jale hain

jo dekhne wale the wo hasrat se jale hain

KHushbu se jale hain kabhi surat se jale hain

bad-KHwah hasad karne ki aadat se jale hain

jal jae jahan KHun nahin khaulta un ka

hum barf-zada logon ki fitrat se jale hain

kab shoalagi lau dene se aai hai kabhi baz

ye husn-e-nazar wale inayat se jale hain

ek aag ke dariya ko bataya hai chaman-zar

hum Dubne walon ki riayat se jale hain

kirdar pe aane hi nahin di hai kabhi aanch

kuchh log mohabbat mein mahaarat se jale hain

is aag mein rahat ke bhi saman hain 'jazib'

samjhaen bhi kaise ki zarurat se jale hain