ہم تھک چکے تھے آپ کے جھوٹے جہان میں

ہم تھک چکے تھے آپ کے جھوٹے جہان میں

تو سو رہے ہیں چین سے اپنے مکان میں

مرجھائے سے جو رہتے تھے شاداب ہو گئے

تتلی نے جانے کیا کہا پھولوں کے کان میں

جوہی گلاب چمپا چنبیلی بھی ہے مگر

رتبہ تمہارا اونچا ہے اس خاندان میں

کوئی سخن شناس انہیں بھی خرید لے

کچھ شعر ٹانگ رکھے ہیں اپنی دکان میں

اپنے حسیں لبوں سے وہ یوں بولتا ہے جھوٹ

جیسے کہ زہر دے رہا ہو میٹھے پان میں

لہجے میں ان کے ویسی مہک آتی ہی نہیں

یہ پھول لاکھ بول لیں تیری زبان میں