hum tere shahr mein aae tere mehman bhi rahe

ham tire shahr meñ aa.e tire mehmāñ bhī rahe

tujh ko chāhā bhī magar tujh se gurezāñ bhī rahe

ab kahīñ duur haiñ ham tere ḳhayāloñ se magar

ham tire shauq kī rūdād ke 'unvāñ bhī rahe

phir tire pyaar kī vo sā’at-e-rangīñ na milī

gardish-e-vaqt se ham dast-o-garebāñ bhī rahe

rāt-bhar koī ḳhalish dil ko satātī hī rahī

band āñkhoñ meñ ka.ī ḳhvāb pareshāñ bhī rahe

bārhā dil ko huā tark-e-ta'alluq kā junūñ

aur phir tujh se mulāqāt ke armāñ bhī rahe

na ga.ī dil kī ye āshufta-mizājī na ga.ī

ham sulaimāñ bhī hue be-sar-o-sāmāñ bhī rahe

luT ga.iiñ jin ke sabab dil kī bahāreñ 'mā’sūm'

gulshan-e-dil ke vahī log nigahbāñ bhī rahe

hum tere shahr mein aae tere mehman bhi rahe

tujh ko chaha bhi magar tujh se gurezan bhi rahe

ab kahin dur hain hum tere KHayalon se magar

hum tere shauq ki rudad ke 'unwan bhi rahe

phir tere pyar ki wo sa’at-e-rangin na mili

gardish-e-waqt se hum dast-o-gareban bhi rahe

raat-bhar koi KHalish dil ko satati hi rahi

band aankhon mein kai KHwab pareshan bhi rahe

barha dil ko hua tark-e-ta'alluq ka junun

aur phir tujh se mulaqat ke arman bhi rahe

na gai dil ki ye aashufta-mizaji na gai

hum sulaiman bhi hue be-sar-o-saman bhi rahe

luT gain jin ke sabab dil ki bahaaren 'ma’sum'

gulshan-e-dil ke wahi log nigahban bhi rahe