hum to aasan samajhte the ki rasta kam tha

ham to āsān samajhte the ki rasta kam thā

is masāfat meñ mohabbat kā ilāqa kam thā

yuuñ to dīvār ke pahlū meñ khaḌe the ham bhī

dhuup aisī thī ki dīvār kā saaya kam thā

kaisā lamha thā ki ham tark-e-safar kar baiThe

ḳhvāb kam the na tire ġham kā asāsa kam thā

qāmat-e-husn meñ saanī hī nahīñ thā us kā

shar-e-be-faiz tirā zauq-e-tamāshā kam thā

ik ta.alluq thā jo TuuTā hai ki ham TuuTe haiñ

phir bhī lagtā hai ki ham ne use chāhā kam thā

hum to aasan samajhte the ki rasta kam tha

is masafat mein mohabbat ka ilaqa kam tha

yun to diwar ke pahlu mein khaDe the hum bhi

dhup aisi thi ki diwar ka saya kam tha

kaisa lamha tha ki hum tark-e-safar kar baiThe

KHwab kam the na tere gham ka asasa kam tha

qamat-e-husn mein sani hi nahin tha us ka

shar-e-be-faiz tera zauq-e-tamasha kam tha

ek talluq tha jo TuTa hai ki hum TuTe hain

phir bhi lagta hai ki hum ne use chaha kam tha