hum tum ki roz-o-shab mile sham-o-sahar mile

ham tum ki roz-o-shab mile shām-o-sahar mile

lekin na dil na zāviya-hā-e-nazar mile

chhalnī haiñ paañv kāñToñ-bharī rahguzar mile

ham ko hamārī shaan ke shāyāñ safar mile

maiñ bhī kuchh apne karb kā iz.hār kar sakūñ

mujh ko bhī kuchh salīqa-e-arz-e-hunar mile

be-māñge paa.eñ buuñd bhī pyāse to jī uTheñ

dariyā bhī le ke ḳhush na hoñ māñge se gar mile

ham bijliyoñ kī zad meñ musalsal raheñ to kyuuñ

ye kyā ki bijliyoñ ko hamārā hī ghar mile

gulshan shaguftagī se ibārat na ho sakā

ġhunche khile khile se to har shāḳh par mile

paimāñ to ye thā mil ke na bichhḌeñge umr-bhar

bichhḌe to is tarah ki na phir umr-bhar mile

tāsīr ke baġhair duā kā bhī kyā mazā

lutf-e-duā ye hai ki ki duā ko asar mile

khul kar tum un se bhī na mile jin se qurb thā

aur ham ki jis kisī se mile TuuT kar mile

Dar hai kahīñ natīja rihā.ī kā ye na ho

zindāñ ke ham raheñ na hameñ apnā ghar mile

kis dil se ārzū-e-ḳhushī kījiye ki ab

his tak ḳhushī kī miT ga.ī ġham is qadar mile

ye zindagī vo taptā huā regzār hai

jis meñ kahīñ na saaya na shāḳh-e-shajar mile

vo hādse jo vaj.h-e-tabāhī bane 'vaqār'

un meñ se kuchh to ghar kī hī dahlīz par mile

hum tum ki roz-o-shab mile sham-o-sahar mile

lekin na dil na zawiya-ha-e-nazar mile

chhalni hain panw kanTon-bhari rahguzar mile

hum ko hamari shan ke shayan safar mile

main bhi kuchh apne karb ka izhaar kar sakun

mujh ko bhi kuchh saliqa-e-arz-e-hunar mile

be-mange paen bund bhi pyase to ji uThen

dariya bhi le ke KHush na hon mange se gar mile

hum bijliyon ki zad mein musalsal rahen to kyun

ye kya ki bijliyon ko hamara hi ghar mile

gulshan shaguftagi se ibarat na ho saka

ghunche khile khile se to har shaKH par mile

paiman to ye tha mil ke na bichhDenge umr-bhar

bichhDe to is tarah ki na phir umr-bhar mile

tasir ke baghair dua ka bhi kya maza

lutf-e-dua ye hai ki ki dua ko asar mile

khul kar tum un se bhi na mile jin se qurb tha

aur hum ki jis kisi se mile TuT kar mile

Dar hai kahin natija rihai ka ye na ho

zindan ke hum rahen na hamein apna ghar mile

kis dil se aarzu-e-KHushi kijiye ki ab

his tak KHushi ki miT gai gham is qadar mile

ye zindagi wo tapta hua regzar hai

jis mein kahin na saya na shaKH-e-shajar mile

wo hadse jo wajh-e-tabahi bane 'waqar'

un mein se kuchh to ghar ki hi dahliz par mile