hum tumhein baddua nahin denge

ham tumheñ badduā nahīñ deñge

itnī lambī sazā nahīñ deñge

ġham ko mahsūs kījiye sāhib

ġham to aise maza nahīñ deñge

apnī bad-sūratī karo mahsūs

ham tumheñ aa.ina nahīñ deñge

ye maraz Thiik hī nahīñ hogā

aap jab tak davā nahīñ deñge

tum ko kar deñge bas supurd-e-ḳhudā

ham koī faisla nahīñ deñge

ḳhud hī ḳhush hoiye vafā kar ke

log dād-e-vafā nahīñ deñge

chain un ko na aa.egā jab tak

apne ehsāñ ginā nahīñ deñge

apnī be-laus chāhatoñ kā kabhī

ham tumheñ vāsta nahīñ deñge

tum mire dost rah chuke ho kabhī

itnī jaldī bhulā nahīñ deñge

dil jo māñ-bāp kā dukhāyā to

dil se vo bhī duā nahīñ deñge

ham muballiġh haiñ ishq ke 'nusrat'

nafratoñ ko havā nahīñ deñge

hum tumhein baddua nahin denge

itni lambi saza nahin denge

gham ko mahsus kijiye sahib

gham to aise maza nahin denge

apni bad-surati karo mahsus

hum tumhein aaina nahin denge

ye maraz Thik hi nahin hoga

aap jab tak dawa nahin denge

tum ko kar denge bas supurd-e-KHuda

hum koi faisla nahin denge

KHud hi KHush hoiye wafa kar ke

log dad-e-wafa nahin denge

chain un ko na aaega jab tak

apne ehsan gina nahin denge

apni be-laus chahaton ka kabhi

hum tumhein wasta nahin denge

tum mere dost rah chuke ho kabhi

itni jaldi bhula nahin denge

dil jo man-bap ka dukhaya to

dil se wo bhi dua nahin denge

hum muballigh hain ishq ke 'nusrat'

nafraton ko hawa nahin denge