ہم ان کی بزم میں لوگوں کو کم دکھائی دئے

ہم ان کی بزم میں لوگوں کو کم دکھائی دئے

کسی نے ہم کو پکارا تو ہم دکھائی دئے

جو سرفراز تھے سر ان کے خم دکھائی دئے

جہاں جہاں ترے نقش قدم دکھائی دئے

وہ جس گلی میں ہمیں روکتے تھے جانے سے

اسی گلی میں کئی محترم دکھائی دئے

سو اپنے دل میں انہیں بھی پناہ دینی پڑی

خوشی کو ڈھونڈ رہے تھے کہ غم دکھائی دئے

پتا چلا کہ دکھاوا تھا اور کچھ بھی نہیں

قدم قدم پہ جو اہل کرم دکھائی دئے

گنا رہے تھے فضیلت جو مل کے رہنے کی

ستیزہ کار وہ سارے بہم دکھائی دئے

یہ اور بات مخاطب نہیں ہوئے ہم سے

یہی بہت ہے کہ وہ کم سے کم دکھائی دئے

سب اپنے آپ کو افضل بتا رہے تھے شکیلؔ

عجیب حال میں اہل حرم دکھائی دئے