hum unki nazar mein samane lage

ham un kī nazar meñ samāne lage

magar jab nazar bhī na aane lage

ye terī suḳhan-sāziyāñ haiñ nadīm

kisī par vo kyuuñ rahm khāne lage

na dī ġhair ne dād-e-tarz-e-sitam

sitam-gar ko ham yaad aane lage

na dānish durust aur bīnish bajā

dil-o-dīda donoñ Thikāne lage

gayā thā ki in kī ḳhushāmad karūñ

vo ulTā mujhī ko banāne lage

kabhī ḳhair-maqdam kabhī marhabā

zabāñ par ye alfāz laane lage

kabhī mere qurbān hote rahī

kabhī mujh ko pañkhā hilāne lage

kabhī leT kar paañv phailā diye

kabhī dekh kar muskurāne lage

kiyā maiñ ne jab azm-e-bos-o-kanār

to uTh baiThe aur muñh chiḌhāne lage

kahīñ phir dupaTTā sambhalne lagā

kahīñ aadmī ko bulāne lage

ḳhudāyā kiyā kis ne un par sitam

ilāhī ye kyuuñ ġhul machāne lage

vo dam meñ kab aate the dete the dam

ki samjhūñ mire dam meñ aane lage

vo mahfil meñ aa.eñ to 'nāzim' zarūr

muġhannī ye ash.ār gaane lage

hum un ki nazar mein samane lage

magar jab nazar bhi na aane lage

ye teri suKHan-saziyan hain nadim

kisi par wo kyun rahm khane lage

na di ghair ne dad-e-tarz-e-sitam

sitam-gar ko hum yaad aane lage

na danish durust aur binish baja

dil-o-dida donon Thikane lage

gaya tha ki in ki KHushamad karun

wo ulTa mujhi ko banane lage

kabhi KHair-maqdam kabhi marhaba

zaban par ye alfaz lane lage

kabhi mere qurban hote rahi

kabhi mujh ko pankha hilane lage

kabhi leT kar panw phaila diye

kabhi dekh kar muskurane lage

kiya main ne jab azm-e-bos-o-kanar

to uTh baiThe aur munh chiDhane lage

kahin phir dupaTTa sambhalne laga

kahin aadmi ko bulane lage

KHudaya kiya kis ne un par sitam

ilahi ye kyun ghul machane lage

wo dam mein kab aate the dete the dam

ki samjhun mere dam mein aane lage

wo mahfil mein aaen to 'nazim' zarur

mughanni ye ashaar gane lage