hum uTh jaenge mahfil se to un ko justuju hogi

ham uTh jā.eñge mahfil se to un ko justujū hogī

hamārā zikr aa.egā hamārī guftugū hogī

ye maanā dekhne ko vo zamāna ham nahīñ hoñge

hameñ DhūñDegī duniyā jab tumhārī justujū hogī

kisī kā ḳhūn-e-nāhaq rā.egāñ to jā nahīñ saktā

vafā kā ruup nikhregā mohabbat surḳh-rū hogī

tumhāre naam se pahle hamārā naam aa.egā

jahāñ ishq-o-vafā ke silsile meñ guftugū hogī

baḌā pur-lutf hogā vo niyāz-o-nāz kā aalam

nazāra tū karegā dil nazar se guftugū hogī

faroġh-e-jalva-gāh-e-nāz apnī hī nazar tak hai

vahāñ tak jalve bhī hoñge jahāñ tak justujū hogī

tajallī ḳhud bhī parda hai magar jab dil se dekheñge

ba-har-sūrat nigāhoñ meñ vo sūrat hū-ba-hū hogī

nazar kā mudda.ā dil kī tamannā kaun dekhegā

vo jān-e-ārzū hogā to kis ko aarzū hogī

bikhar jā.egā sab husn-e-chaman-bandī kā shīrāza

havā-e-sar-kashī meñ jab fazā-e-rañg-o-bū hogī

ham is muñh boltī bechārgī par dam-ba-ḳhud hoñge

vo hoñge sāmne be-ḳhud nigāh-e-jalva-jū hogī

salīqa aate aate aayā hai nazroñ se piine kā

'rishī' ab mai-kashī be-gāna-e-jām-o-subū hogī

hum uTh jaenge mahfil se to un ko justuju hogi

hamara zikr aaega hamari guftugu hogi

ye mana dekhne ko wo zamana hum nahin honge

hamein DhunDegi duniya jab tumhaari justuju hogi

kisi ka KHun-e-nahaq raegan to ja nahin sakta

wafa ka rup nikhrega mohabbat surKH-ru hogi

tumhaare nam se pahle hamara nam aaega

jahan ishq-o-wafa ke silsile mein guftugu hogi

baDa pur-lutf hoga wo niyaz-o-naz ka aalam

nazara tu karega dil nazar se guftugu hogi

farogh-e-jalwa-gah-e-naz apni hi nazar tak hai

wahan tak jalwe bhi honge jahan tak justuju hogi

tajalli KHud bhi parda hai magar jab dil se dekhenge

ba-har-surat nigahon mein wo surat hu-ba-hu hogi

nazar ka muddaa dil ki tamanna kaun dekhega

wo jaan-e-arzu hoga to kis ko aarzu hogi

bikhar jaega sab husn-e-chaman-bandi ka shiraaza

hawa-e-sar-kashi mein jab faza-e-rang-o-bu hogi

hum is munh bolti bechaargi par dam-ba-KHud honge

wo honge samne be-KHud nigah-e-jalwa-ju hogi

saliqa aate aate aaya hai nazron se pine ka

'rishi' ab mai-kashi be-gana-e-jam-o-subu hogi