hum zat ke kankar hain pe hire ki tarah hain

ham zaat ke kankar haiñ pe hiire kī tarah haiñ

ham bujh ke bhī manzar meñ savere kī tarah haiñ

pahuñchā.eñge ghar tum ko bhaTakne nahīñ deñge

jañgal se guzarte hue raste kī tarah haiñ

kuchh TuuTī huī pencileñ phūTe hue kāġhaz

ham haiñ to magar bachche ke baste kī tarah haiñ

ashjār kā dīvār kā galiyoñ kā hameñ dukh

is shahr meñ hamdard ḳhazāne kī tarah haiñ

tum jab bhī bulāoge chale ā.eñge yaaro

ham daur-e-girānī meñ bhī saste kī tarah haiñ

jo aatā hai zanjīr-ba-pā aatā hai 'sāġhar'

ziine kisī manzil ke kaTahre kī tarah haiñ

hum zat ke kankar hain pe hire ki tarah hain

hum bujh ke bhi manzar mein sawere ki tarah hain

pahunchaenge ghar tum ko bhaTakne nahin denge

jangal se guzarte hue raste ki tarah hain

kuchh TuTi hui pencilen phuTe hue kaghaz

hum hain to magar bachche ke baste ki tarah hain

ashjar ka diwar ka galiyon ka hamein dukh

is shahr mein hamdard KHazane ki tarah hain

tum jab bhi bulaoge chale aaenge yaro

hum daur-e-girani mein bhi saste ki tarah hain

jo aata hai zanjir-ba-pa aata hai 'saghar'

zine kisi manzil ke kaTahre ki tarah hain