hum zamin-zadon ko aasman bana jaana

ham zamīn-zādoñ ko āsmāñ banā jaanā

pahle ḳhaak kar denā aur phir uḌā jaanā

jism se judā rahnā ruuh meñ samā jaanā

koī aap se sīkhe jaan par banā jaanā

be-shu.ūr sāthī ne sāhiloñ ke baasī ne

ham ko sar-phirā samjhā dasht kī havā jaanā

aur gar qarīb aate naqsh aur dhundlāte

qurbatoñ kī duurī ko tum ne fāsla jaanā

be-zamīr shahroñ ke be-zamīr logoñ se

jo bhī mil gayā ham ko vo tirī atā jaanā

hum zamin-zadon ko aasman bana jaana

pahle KHak kar dena aur phir uDa jaana

jism se juda rahna ruh mein sama jaana

koi aap se sikhe jaan par bana jaana

be-shuur sathi ne sahilon ke basi ne

hum ko sar-phira samjha dasht ki hawa jaana

aur gar qarib aate naqsh aur dhundlate

qurbaton ki duri ko tum ne fasla jaana

be-zamir shahron ke be-zamir logon se

jo bhi mil gaya hum ko wo teri ata jaana