hum zindagi-shanas the sab se juda rahe

ham zindagī-shanās the sab se judā rahe

bastī meñ haul aayā to jañgal meñ jā rahe

kamre meñ mere dhuup kā aanā ba-vaqt-e-sub.h

āñkhoñ meñ kaash ek hī manzar basā rahe

phir aaj mere dard ne mujh ko manā liyā

koī kisī aziiz se kab tak ḳhafā rahe

kab tak kisī paḌāv pe vahshat kare qayām

kab tak kisī ke hijr kā saaya ghanā rahe

baabā ye mujh haqīr ko itnī baḌī duā

tū baat kā dhanī hai tirā qad sivā rahe

'shahpar' sada-e-vaqt se kar lo musālahat

mahrūmiyoñ ke dar pe koī kyuuñ paḌā rahe

hum zindagi-shanas the sab se juda rahe

basti mein haul aaya to jangal mein ja rahe

kamre mein mere dhup ka aana ba-waqt-e-subh

aankhon mein kash ek hi manzar basa rahe

phir aaj mere dard ne mujh ko mana liya

koi kisi aziz se kab tak KHafa rahe

kab tak kisi paDaw pe wahshat kare qayam

kab tak kisi ke hijr ka saya ghana rahe

baba ye mujh haqir ko itni baDi dua

tu baat ka dhani hai tera qad siwa rahe

'shahpar' sada-e-waqt se kar lo musalahat

mahrumiyon ke dar pe koi kyun paDa rahe